 |
| الشاعر ا.د معز عمر بخيت |
(قصيدة سودانية)
مهداه إلى الرئيس السوداني عمر البشير
ما بنحاورك
للشاعر
أ .د معز عمر بخيت
----
ما بنحاورك
وما بنقيف قدامك لحظة
وشعبنا ناكرك
وما بنغطي عيوبك ونطلع
من أعصابنا
ونبقى حوارك
نغض أبصارنا
وننسى ديارنا
واهل الحوبة العاشوا جوارك
فقرانين بالذل عايشن
يا تاجر الدين النهب شعارك
وظلمك وجورك غطى حضورك
ما ناسين والله مجازرك
يونيو الاسود كتل احلامنا
وروح اسلامنا
وجاب من آخرك
ولسة تحاول
لا في ايدك فاس لا معاول
لا بتفزعنا ولا بتنفعنا
ولا في الدنيا ح نمشي مسارك
وشعبك ضايع وجايع وخاضع
لكن ساترك
لا طيبت مواجع الأمة
لا شبّعت بطون بأوامرك
لا فكيت من حاير غمة
لا داويت مجروح بمشاعرك
تقتل وتنفي
وتسرق وتخفي
وذنبك عاصرك
وربنا عالم انت الظالم
وانت ضميرك ميت وهاجرك
بالوسواس ومهانة الناس
والخناس في شرّك باهرك
ما تتصور انك خالد
وحكمك والد
وما تتخيل ليلك سامرك
ما بتدوم والله الدنيا
ولاك الواحد وسيّد خاطرك
ما مسامحنك
وما راضين
عن سختك وجنك
ولا التاريخ يا غادر عاذرك
ما بنحاورك
وما بنحرك ساكن حولك
لو تعفصنا بحدوة حافرك
وما بتلاقي سلاطين غيرنا
وما ح يجيك في المشهد خيرنا
فسادك غامرك
والعصيان راجيك يا جاير
والشيطان مستحلي مظاهرك
كل العالم منك نافر
وشعبي الطيب ما هو مآذرك
كيفن ترحل عن دنيانا
ما عايزنك تاني معانا
بئس اليوم الجاب اقدارك
ملعون الحس الميت وغايب
ملعون الخوف الولع نارك
ابعد و ارحل
اضحك وازعل
ودوّر ظارك
اطلع مارق زمنك فارق
صوت كشكوشك ورنة طارك
ما بنحاورك
ونبني محاورك
وما بنعيش أبداً في مدارك
ما بنحاورك
ونبني محاورك
